Anno de iscritura:1914.
Prima editzione: La Justicia Social, 7
Freàrgiu 1914
Tradutzione: Dae Andrea Pili, 2013.
Editzione dae marxists.org: Marxists Internet Archive,
13 de Santu Adria / Donniasantu 2013.
Is caràteres de su sotzialismu non sunt, ne podent essere, econòmicos ebbia. Su sotzialismu est sa prus perfeta e ammiràbile realizatzione de su ideale pedagògicu sotziale, in armonia cun su fine chi Herbert Spencer at giadu a s'educatzione: ”batire s'òmine a sa vida cumpleta”. A dolu mannu, su printzìpiu de sa pelea de classe non nos est bastante pro risolvere is medas e vàrios problemas chi sa cumplessidade de sa vida sotziale tratat.
Su problema sotziale no est una simpre chistione de istòmagu. In ònnia modu, su problema isceti econòmicu at a essere su fundamentale, at a costituire s'ànima de su sotzialismu, chena de su cale custu no diat tennere regione de esistere; ma custu rapresentat solu unu aspetu — chena duda su prus de importu — de sa chistione sotziale, chi si depet risolvere “batende” s'òmine a su gosu prenu de sa vida.
Custu pro ite, pustis de s'econòmicu, b'at unu problema chi atraet in manera forte s'atentzione mea, rispondende a unu bivu ischinitzu[1] ispirituale comente sotzialista e comente òmine, comente simpre allampiadore[2] de is fatos e de is fenòmenos sotziales: su problema natzionalista.
Su natzionalismu tenet comente fine sa liberatzione de is pòpulos. Su natzionalismu tenet comente fine sa
liberatzione de is òmines. Sa liberatzione de is pòpulos e sa liberatzione de is òmines produent is prus profundas convulsiones in is istados modernos. No at a essere paghe in sa terra finas a chi no si ant a irvulare[3] custas immensas ganas de libertade chi intendent is pòpulos de custu sèculu.
Natzionalismu e sotzialismu podent parrere duas paràulas antitéticas, ma is fines issoro si cunfundent e si cumplementant paris, esistende intra ambos una ìntima e indistrutìbile unidade. Unu e s'àteru minetzant is matessi fundamentos de sa sotziedade atuale. Peruna dotrina est tantu rivolutzionària che custas.
Su natzionalismu atacat sa organizatzione e sa carena de is istados: assorbentes, unitàrios, tzentralistas, tirannicos e dominadores; su sotzialismu atacat su regime capitalista, sa propiedade privada e sa moderna forma de tzerachia rapresentada dae su salàriu.
Si su sotzialismu otenneret, cun su isfortzu suo, chi s'unicu podere de sa burghesia ruat, isparessende cun issu sa ingiustìtzia de sa disegualidade econòmica de sa sotziedade tzivilizada, su natzionalismu at a lompere, pro atzione sua de ònnia die prus biva e prus intensa, sa bìnchida contra sa burghesia in totas is trintzeas suas, leende a issa sa fortza sua e s'aina de opressione prus mannosa: su istadu.
_________________
[1] Idea chi trumentat sa conca; comente una cosa chi si depet faghere de presse, pro timoria puru
[2] Osserbadore
[3] Bogare su disigiu